მელქიორის შენადნობი შექმნეს ფრანგმა გამომგონებლებმა მაიომ და შორიემ მეცხრამეტე საუკუნეში, სახელწოდებაც სწორედ მათი სახელების კომბინაციიდან მოდის(Maillot(მაიო) და Chorier(შორიე).
როგორ გავწმინდოთ მელქიორი
მელქიორის ნაკეთობასთან სწორი მოპყრობის შემთხვევაში, მას რთულად თუ გაარჩევთ ვერცხლისგან, ფერითა და ძირითადი თვისებებით. ვერცხლისგან განსხვავებით, მელქიორი უფრო გამძლე მასალაა და დიდხანს მოგემსახურებათ, თუმცა, უნდა იცოდეთ, როგორ მოუაროთ მას სწორად.
მელქიორს ახასიათებს გაშავება ნესტის მოქმედების შედეგად. იმისათვის, რომ მელქიორის ნაკეთობა არ გამუქდეს დროთა განმავლობაში, აუცილებელია მათი რეგულარული წმენდა.
არ გამოიყენოთ მათზე ძლიერი ქიმიური საშუალებები და აბრაზული ნივთიერებები, რეცხვის შემდეგ კი გაამშრალეთ. დაკაწვრის აღსაკვეთად არ გამოიყენოთ კბილის პასტა და ფხვნილები, ქლორისშემცველი საშუალებით გაწმენდა კი საერთოდ გაუფუჭებს ჭურჭელს იერს.
რჩევების რედაქციამ მოაგროვა ხალხური საშუალებების სია, რომლებიც დაგეხმარებათ მელქიორის ნაკეთობების გაწმენდაში ისე, რომ მეტალი არ დააზიანოთ და არ გამოიწვიოთ კოროზიული პროცესები.
- სპირტი
თუ ჭურჭელი ოდნავ გაშავდა, საკმარისია მათი გაწმენდა სპირტში ჩალბობილი ღრუბელით. მეორე ვარიანტი: ჩაუშვით ნაკეთობა ნიშადურის სპირტში, გაავლეთ და გაამშრალეთ.
- ლიმონმჟავა
გახსენით ლიტრ წყალში 2 ს.კ. ლიმონმჟავა, ჩადეთ ხსნარში სპილენძის მავთულის პატარა ნაჭერი. ჩაალაგეთ ჭურჭელი 2 საათით, გაავლეთ და გაამშრალეთ.
- ძმარი
ნესტის ლაქების ამოყვანა შეგიძლიათ თბილი ძმრის ხსნარის გამოყენებითაც(1 ჩ.კ. ძმარი ჭიქა თბილ წყალში). ჩაალბეთ მასში ტილო და გაწმინდეთ ჭურჭელი. გარეცხეთ და გააშრეთ.
- სოდა
მსუბუქი დაზიანების შემთხვევაში საკმარისია სოდის ხსნარიც(50 გ სოდა 1 ლ წყალზე). მელქიორის ასეთი წმენდა რეკომენდებულია ყოველი გამოყენების შემდეგ. წაუსვით სოდა ნოტიო ღრუბელს და ფრთხილად გაწმინდეთ ნაკეთობა. გაავლეთ ცივი წყლით და გაწმინდეთ.
- კვერცხის ნაჭუჭები
1 ლ წყალზე გჭირდებათ ორი უმი კვერცხის ნაჭუჭი. აადუღეთ ხსნარი და ჩაყარეთ მასში ჭურჭელი რამდენიმე წუთით. შემდეგ გაავლეთ სუფთა წყლით და გაამშრალეთ.
კიდევ ერთი ხალხური საშუალებაა ნივრის ნაჭუჭი. დიდი რაოდენობით ნაჭუჭს დაასხით წყალი. როცა ნახარში ადუღდება, ჩაყარეთ მასში მელქიორის ნაკეთობა და ხარშეთ, სანამ არ გაპრიალდება. რაც უფრო ბინძურია ჭურჭელი, მით მეტი დრო დაგჭირდებათ.
გაათბეთ რძის შრატი და ჩაყარეთ მასში მელქიორის ნაკეთობა. გააჩერეთ ისინი სითხეში 15-20 წუთით, გარეცხეთ და გააშრეთ.
გამუქებული ჭურჭელი დაალაგეთ ქვაბის ფსკერზე. დაასხით ტკბილი გაზიანი სასმელი(კარგია კოკა-კოლა), მთლიანად დაფარეთ ჭურჭელი. ორი საათის შემდეგ გაავლეთ ჭურჭელი წყლით და გაწმინდეთ ხელსაწმენდით.
როგორ შევინარჩუნოთ შედეგი
იმისათვის, რომ ჭურჭლის მოხმარების ვადა გაახანგრძლივოთ, დაიცავით შემდეგი წესები:
- შეინახეთ ჩანგლები და კოვზები ნაკლებად ტენიან ადგილში.
- არ გამოიყენოთ მათ გასაწმენდად მათეთრებელი და ანალოგიური ქლორისშემცველი საშუალებები.
- არ გარეცხოთ ჭურჭლის სარეცხ მანქანაში.
