ჟელატინი წინასწარ ცივ წყალში უნდა ჩავალბოთ, გავწუროთ და ისე გავურიოთ ჟელეს დასამზადებელ მასალას. დალბობა - გაღვივების დროს ჟელატინი წონაში 6-8-ჯერ მატულობს.
ზოგიერთ ჟელეს გემოს გასაუმჯობესებლად ემატება ცოტაოდენი ღვინო. სიმჟავის ნაკლებობის დროს კი - მცირე რაოდენობით ლიმონის მჟავა.
თუ ჟელეს მასალა მღვრიე ფერისაა, მოვიქცეთ შემდეგნაირად: კვერცხის ცილა და მისი თანაბარი რაოდენობის ცივი წყალი ჩავასხათ ჟელეს მასალაში, შევდგათ ცეცხლზე და მივიყვანოთ ადუღებამდე. შემდეგ გავწუროთ მიტკლის პარკში.
მზა ჟელე უნდა იყოს გამჭვირვალე, ტკბილმჟავე გემოსი, არომატი უნდა ჰქონდეს იმ ხილისა, რომლისგანაც ის მომზადდა, რძისა და ნაღებისგან მომზადებულ ჟელეს უნდა ჰქონდეს სურნელოვანი სანელებლის არომატი (ვანილი, ლიმონის ქერქი, შოკოლადი და სხვ).
ხილ-კენკრისგან მზადდება აგრეთვე მეორე სახის არაგამჭვირვალე მუს-ჟელე. ამ სახის ჟელეს მომზადების დროს შაქრის სიროფი, ჟელატინი და ხილ-კენკრის მწვენი ერთად უნდა აირიოს, გაიწუროს, გაცივდეს 30-35 გრადუსამდე და შემდეგ კარგად აითქვიფოს სათქვეფლით ყინულზე დადებულ ჭურჭელში. როდესაც ჟელე სქელ ქაფად იქცევა, გადავიტანოთ პატარა ზომის ჭურჭელში და დავდგათ გასაცივებლად.
მუს-ჟელეს მომზადების დროს ხილის სიროფის ნაცვლად შეიძლება გამოვიყენოთ ხილფაფა. საკმაოდ სქელ პავიდლოს უნდა დავუმატოთ შაქარი, კვერცხის ცილა, დავდგათ ყინულზე და ავთქვიფოთ, ვიდრე მოცულობით ორჯერ მეტი არ გახდება. შემდეგ ჩავასხათ ცხელ წყალში დამბალი ჟელატინი და გავიტანოთ გასაცივებლად.
ზოგჯერ ჟელატინის ნაცვლად შეიძლება გამოვიყენოთ თავნაფქვი ბურღული, ბურღული უნდა მოიხარშოს წყალში, ჩაემატოს შაქარი, ხილ-კენკრის ფაფა, აითქვიფოს და შემდეგ გაცივდეს. სუფრაზე მიტანის წინ კარგად გაცივებული ჟელატინიანი ყალიბი ერთი წამით უნდა ჩავუშვათ მდუღარეში და შემდეგ გადმოვაპირქვავოთ თეფშზე ან ლარნაკზე. თავნაფქვბურღულიან მუსჟელესთან ერთად სუფრაზე უნდა მივიტანოთ იმ ხილის სიროფი, რომელიც ურევია დამზადებულ ჟელეს.
