წვენი - საწებელი ცალკე კერძი კი არ არის, არამედ სხვა კერძების დამატებაა. საწებლის სათანადოდ მოზადებას დიდი მნიშვნელობა აქვს. კარგად შემზადებულ საწებელს შეუძლია გამოაკეთოს დაბალი ან საშუალო ხარისხის კერძი, მაშინ როდესაც ცუდ საწებელს შეუძლია გააფუჭოს საუკეთესო კერძი. საწებელი შერჩეული უნდა იქნეს სხვადასხვა კერძის შესაფერისად.
არსებობს მრავალი სახის ცხელი და ცივი საწებლები. მოვიყვანთ ზოგიერთი სახის საწებლის მომზადების წესს.

მწავანე ხახვის საწებელი არაჟნით

ინგრედიენტები:

• მწვანე ხახვი - 200 გრამი
  
• ერბო - 50 გრამი
  
• ტომატი - 1 ჩაის ჭიქა
  
• პურის ფქვილი - 1 ჩაის კოვზი
  
• არაჟანი -1 ჩაის ჭიქა
  
• მარილი - გემოვნების მიხედვით
  

მომზადების წესი:
კარგად დარჩეული მწვანე ხახვი დავჭრათ წვრილად და მოვშუშოთ ერბოში, ისე რომ არ შეწითლდეს. დავასხათ ნახევარი ჩაის ჭიქა წყალი, 1 ჩაის ჭიქა ტომატი, ავურიოთ 1 ჩაის კოვზი ფქვილი და წამოვადუღოთ. შემდეგ გადმოვიღოთ ცეცხლიდან და ჩავასხათ 1 ჩაის ჭიქა არაჟანი, თან სწაფად ვურიოთ. ტომატის ნაცვლად შეიძლება ვიხმაროთ 1 ჩაის ჭიქა თეთრი ღვინო.
ტომატიანი საწებელი ძალიან კარგია შემწვარ კერძებთან, ხოლო ღვინით გაკეთებული მოხარშულ კერძებთანაც იხმარება.