» » » შეკრულობის დროს მეტად ეფექტიანია სამკურნალო ფიზკულტურა, მუცლის მასაჟი და სუნთქვითი ვარჯიშები

შეკრულობის დროს მეტად ეფექტიანია სამკურნალო ფიზკულტურა, მუცლის მასაჟი და სუნთქვითი ვარჯიშები

შეკრულობის დროს მეტად ეფექტიანია სამკურნალო ფიზკულტურა, მუცლის მასაჟი და სუნთქვითი ვარჯიშები. ქვემოთ მოცემული კომპლექსი აუმჯობესებს ორგანიზმის ზოგად ფსიქოფიზიკურ ტონუსს და კუჭ-ნაწლავის მუშაობას, ასტიმულირებს მუცლის ღრუში სისხლის მომოქცევას, ამაგრებს მუცლის პრესს.

მასაჟი
დაიზილეთ ხელის ნეკის კუნთი თითის სრულ მოდუნებამდე (მამაკაცებმა - ჯერ მარჯვენა, შემდეგ მარცხენა, ქალებმა - პირიქით).
გულმკერდის სიმაღლეზე გადააჯვარედინეთ ნეკა თითები და რაც ძალი და ღონე გაქვთ, აქეთ-იქით გაქაჩეთ.

წერტილოვანი მასაჟი
შეკრულობისას მსხვილი ნაწლავის დაღმავალი ნაწილის საპროექციო არეში, ჭიპის დონეზე ან ოდნავ ქვემოთ, ხშირად შეიმჩნევა კუნთების დაჭუმულობა. ასეთ დროს სამი თითი (საჩვენებელი, შუა თითი და არათითი ) 3 წუთის განმავლობაში დაიჭირეთ ამ ადგილზე. ზეწოლა გაიმეორეთ 5-6-ჯერ. ზეწოლისას კანი ქვემოთ და ცენტრისკენ გადასწიეთ. მასაჟის შემდეგ დალიეთ ერთი ჭიქა თბილი წყალი. პროცედურა ტარდება ყოველ დილით, უზმოზე.

მუცლის მასაჟი
მუცლის მასაჟი აუმჯობესებს ნაწლავთა მამოძრავებელ ფუნქციას (პერისტალტიკას). ყოველ დილით, საწოლიდან ადგომამდე, ზურგზე მწოლიარემ და ფეხებგამართულმა მასაჟი ღრმა რიტმულ სუნთქვას შეუთავსეთ: ჩაისუნთქეთ და მუცელი მსუბუქად (ხელების მსუბუქი დაჭერით) დაიზილეთ, ამოსუნთვისას შეჩერდით.
ხშირად მიმართავენ მუცლის წრიულ მასაჟს საათის ისრის მიმართულებით: ხელისგული მუცლის შუახაზიდან ოდნავ მარჯვნივ დაიდეთ, ზომიერად დააწექით და თანდათან გადაადგილეთ: მარჯვნივ - ზემოთ, ნეკნთა რკალამდე - ნეკნთა მარცხენა რკალამდე - ქვემოთ მარჯვნივ. ამ დროს ისუნთქეთ აუჩქრებლად და ღრმად.

სამკურნალო ვარჯიშების კომპლექსი სპასტიკური შეკრულობის დროს
  1. საწყისი მდგომაორეობა: დადექით ფეხზე, შემოირტყით დოინჯი და ფეხები მხრების სიგანეზე გაშალეთ. მთელი ტანით 4-5-ჯერ დაიხარეთ ჯერ მარჯვნივ, შემდეგ მარცხნივ. ვარჯიშის ტემპი საშუალოა, სუნთქვა - თავისუფალი.

  2. საწყისი მდგომარეობა - იგივე. ტანი მაქსიმალური ამპლიტუდით წრიულად აბრუნეთ ხან მარჯვნივ, ხან მარცხნივ, თითოეულ მხარეს 3-4-ჯერ. ტემპი საშუალოა, სუნთქვა - თავისუფალი.

  3. საწყისი მდგომარეობა: დადექით ფეხზე, შემოირტყით დოინჯი, ფეხები მიატყუპეთ. 6-8-ჯერ ჩაიცუცქეთ ფეხის წვერებზე. ზურგი გამართული გქონდეთ. სუნთქვა არ შეიკავოთ. ვარჯიშის ტემპი - საშუალო.

  4. საწყისი მდგომარეობა: დაწექით ზურგზე, ხელები ტანის გასწვრივ დაიწყვეთ, ფეხები შეატყუპეთ. ფეხები რიგრიგობოთ მოხარეთ მუხლებში და მკერდთან მიიტანეთ. მოძრაობა თითოეული ფეხით 3-6-ჯერ შეასრულეთ. ტემპი ნელია, სუნთქვა - თავისუფალი.

  5. საწყისი მდგომარეობა: დაწექით ზურგზე, ხელები ტანის გასწვრივ დაიწყვეთ, ფეხები მუხლებში მოხარეთ. ჩასუნთქვისას ფეხები გაჭიმეთ, ამოსუნთქვისას კი საწყის მდგომარეობას დაუბრუნდით. ვარჯიში გამეორეთ - 4-6-ჯერ. ტემპი - საშუალო.

  6. საწყისი მდგომარეობა - დაწექით ზურგზე, ხელ-ფეხი მოხარეთ. ჩასუნთქვისას ზურგი ასწიეთ, დაეყრდენით თავს, ბეჭებს, იდაყვებსა და ტერფებს. ამოსუნთქვისას დაუბრუნდით საწყის მდგომარეობას. ვარჯიში გაიმეორეთ 4-6-ჯერ. ტემპი - საშუალო.

  7. საწყისი მდგომარეობა: დადექით ოთხზე. ჩასუნთქვისას მონაცვლეობით ასწიეთ გაჭიმული ფეხები უკან და მაღლა. ამოსუნთქვისას დაუბრუნდით საწყის მდგომარეობას. მოძრაობა თითოეული ფეხით 3-4-ჯერ გაიმეორეთ. ტემპი - საშუალო.

ინფორმაცია
თქვენ შემოხვედით როგორც სტუმარი ამიტომ არ გაქვთ კომენტარის დაწერის უფლება.კომენტარის წერის უფლების მოსაპოვებლად საკმარისა გაიაროთ რეგისტრაცია. თუ რეგისტრაცია უკვე გავლილი გაქვთ მაშინ გაიარეთ ავტორიაცია.